Kryetari i Grupit Parlamentar të PD-së, Gazment Bardhi, ka reaguar ndaj qëndrimit të Komisionit Europian për trajtimin e kërkesave për heqjen e imunitetit të deputetëve, duke e cilësuar atë si një thirrje të drejtpërdrejtë për Kuvendin që të mos bllokojë drejtësinë.
Bardhi përshëndeti deklaratën e Komisionit Europian, ku theksohet se Kuvendi ka përgjegjësinë të trajtojë pa vonesë këto kërkesa dhe se lufta kundër korrupsionit është thelbësore për integrimin europian të Shqipërisë.
Sipas tij, ky është një apel i drejtpërdrejtë për Kryetarin e Kuvendit.
Ai akuzoi Kryetarin e Kuvendit se për tetë javë ka vepruar kundër drejtësisë, duke zbatuar urdhra politikë të kryeministrit Edi Rama, dhe se Kuvendi po përdoret si “bunker i korrupsionit qeveritar”.
Reagimi i Gazment Bardhit:
Grupi Parlamentar i Partisë Demokratike përshëndet qëndrimin e Komisionit Europian dhe shpreh mirënjohjen për nxitjen e autoriteteve shqiptare që të mos pengojnë drejtësinë.
Qëndrimi i Komisionit Europian që: “Është përgjegjësi e Kuvendit të Shqipërisë të trajtojë PA VONESË kërkesat për heqjen e imunitetit të anëtarëve të tij. Lufta efektive kundër korrupsionit është e një rëndësie parësore për përparimin e Shqipërisë drejt anëtarësimit në BE, që është edhe pritshmëria e qytetarëve të saj”, është një apel i drejtëpërdrejtë për Kryetarin e Kuvendit.
Për fat të keq, Kryetari i Kuvendit për 8 javë me rradhë ka qenë në krye të frontit kundër drejtësisë, sipas urdhrit politik të Edi Ramës për ta shndërruar Kuvendin në bunker të korrupsionit qeveritar. Ripërsërisim qëndrimin tonë që sot është momenti që Kryetari i Kuvendit të zgjedhë: ose në anën e ligjit, ose në anën e pengimit të drejtësisë!
