Moti i keq me reshje shiu, që ka përfshirë vendin prej mbrëmjes së kaluar, ka shkaktuar sërish problematika në qytetin e Durrësit.
Kanë mjaftuar vetëm pak minuta shi që qyteti bregdetar të përfshihet nga kaosi. Sipas raportimeve, uji ka vërshuar në rrugë duke vështirësuar qarkullimin e automjeteve dhe këmbësorëve në disa lagje të qytetit.
Deri më tani situata më problematike paraqitet në zonën e Currilave, ku sipas raportimeve ka pasur rrëshqitje dherash dhe është bllokuar rruga.
Probleme raportohen edhe në zonën përreth stadiumit dhe në disa kryqëzime, ku prezenca e ujit është rritur ndjeshëm. Situata paraqitet e rënduar ndërkohë që asnjë mjet i strukturave shtetërorë nuk ndodhet në vendngjarje.
Kjo është hera e dytë brenda pak muajsh që Durrësi përmbytet me vetëm pak minuta shi. Vetëm pak kohë më parë në qytetin bregdetar u përmbytën dhjetëra ha tokë, rrugë dhe banesa. Gjithashtu u evakuuan dhjetëra familje.
