Me nisjen e reshjeve të shiut në vend, Durrësi është përballur sërish me përmbytje, duke nxjerrë edhe një herë në pah mungesën e masave parandaluese dhe papërgatitjen e institucioneve.
Vetëm pak javë pas përmbytjeve masive që prekën qytetin, situata është përsëritur, duke vështirësuar ndjeshëm jetën e banorëve.
Uji ka vërshuar në rrugët kryesore të qytetit bregdetar, duke penguar qarkullimin e automjeteve dhe lëvizjen e këmbësorëve. Problemet më të theksuara janë evidentuar në kryqëzimet e Durrësit dhe në zonën pranë stadiumit “Niko Dovana”, ku niveli i ujit ka arritur deri në trotuare.
Situata më alarmante është shënuar në lagjen e “Currilave”, ku për shkak të intensitetit të reshjeve janë shkaktuar rrëshqitje dherash nga shpatet e kodrave.
Balta dhe uji kanë bllokuar një kah të rrugës, duke krijuar rrezik për banorët dhe drejtuesit e mjeteve, ndërsa ndërhyrjet kanë qenë të vonuara.
Në një qytet turistik si Durrësi, ku investimet propagandohen si prioritet, pamjet e rrugëve të përmbytura dhe lagjeve të mbuluara nga balta tregojnë një realitet tjetër: moti i keq vazhdon të gjejë shtetin të papërgatitur.
