Ish-deputeti i Partisë Demokratike, Dashnor Sula, është emëruar Kryeinspektor i Përgjithshëm.
Nga një opozitar kritik ndaj qeverisë, ai i është bashkuar sot strukturave që më parë i akuzonte se mbajnë peng vendin.
Gjatë debateve në Kuvend, kryeministri Edi Rama i kishte vendosur Sulës nofkën “gjel deti i Peqinit”, por pavarësisht se dikur e shihte si një zog i zhurmshëm, sot raporti mes palëve duket se ka marrë një tjetër drejtim.
“Pusho gjel deti, pusho me atë fjalor se nuk je në festën e gjelave të detit të Peqinit.
Pusho bedel. Si nuk ju vjen turp. Ngrini ulni dynjanë hajdutë”, bërtiste Rama në parlament.
Dëshira për një post, e shitur si detyrë shtetërore për t’u ardhur në ndihmë qytetarëve, vjen përpara turpit politik. Në fund të ditës, siç thuhet shpesh, çudia më e madhe tre ditë zgjat.
Në këtë kontekst, vlen të kujtohet edhe rasti i Endri Shabanit, i cili gjatë fushatës zgjedhore deklaronte se Rama ishte e keqja më e madhe e këtij vendi, ndërsa më pas, me votën e tij, u zgjodh Avokat i Popullit.
