Avokati Arben Llangozi ka reaguar pas vendimit të Gjykatës Kushtetuese, ku u rrëzua kërkesa e Kryeministrit Rama për shfuqizimin e masës së pezullimit nga detyra të Belinda Ballukut.
Vendimin ai e ka cilësuar si një zhvillim të rëndësishëm në praktikën kushtetuese dhe penale të vendit.
Llangozi thekson se ky precedent i jep SPAK- ut bazën ligjore për t’iu drejtuar Gjykatës së Posaçme edhe për vendosjen e masës së pezullimit nga detyra ndaj Edi Ramës.
Reagimi:
Vendimi i fundit i Gjykatës Kushtetuese, me të cilin u rrëzua kërkesa e Kryeministrit për shfuqizimin e masës së pezullimit nga detyra, shënon një zhvillim të rëndësishëm në praktikën kushtetuese dhe penale të vendit. Ky vendim krijon një precedent të qartë ligjor mbi trajtimin e masave të sigurimit ndaj funksionarëve të lartë publikë.
Me këtë standard tashmë të konsoliduar, SPAK ka bazën ligjore për t’iu drejtuar Gjykatës së Posaçme me kërkesë për vendosjen e masës së pezullimit nga detyra edhe për Kryeministrin Edi Rama, në rast se vlerësohet se janë përmbushur kushtet e parashikuara nga ligji. Vendimi i Gjykatës Kushtetuese qartëson se ushtrimi i funksionit publik nuk përbën pengesë për vendosjen e masave parandaluese.
Ky zhvillim përforcon parimin e barazisë para ligjit dhe idenë se pushteti politik nuk duhet të shërbejë si mburojë ndaj drejtësisë. Standardi i vendosur nuk është personal, por institucional, dhe ai duhet të zbatohet në mënyrë të njëjtë për çdo zyrtar të lartë shtetëror.
Vendimi përbën gjithashtu një provë për pavarësinë dhe seriozitetin e institucioneve të reja të drejtësisë. Veprimet e mëtejshme të SPAK dhe vendimmarrja e Gjykatës së Posaçme do të jenë përcaktuese për besimin e publikut dhe për konsolidimin real të shtetit të së drejtës.
