Dyshime ngrihen për kontrabandën e karburanteve në Shqipëri nga vende nën embargo, si Rusia dhe Irani, por edhe përmes vendeve proxy si Libia.
Sipas Faktor.al, teksa përmend një kabllogram konfidencial të Ambasadës në Tiranë karburantet dyshohet se hyjnë në vendin tonë me dokumentacion të shkëmbyer ose të modifikuar në Qipro dhe Turqi, duke kamufluar origjinën reale të mallit dhe duke shmangur kontrollet ligjore dhe doganore.
Burimet bëjnë me dije se përmasat e evazionit fiskal janë alarmante. Llogaritjet paraprake flasin për deri në 1 milion tonë karburant të padeklaruar, me një vlerë që përkthehet në rreth 1 miliard euro humbje për buxhetin e shtetit, përmes taksave dhe detyrimeve të papaguara.
Ky zhvillim vjen në një kohë kur, gjatë fushatës para zgjedhjeve, kryeministri Edi Rama ka deklaruar publikisht se qeveria po tregon “guxim” në luftën kundër informalitetit, veçanërisht në tregun e naftës dhe të ilaçeve, sektorë tradicionalisht problematikë për ekonominë shqiptare.
Megjithatë, rezultatet konkrete në terren mbeten të dobëta, si në drejtim të formalizimit real të tregut, ashtu edhe në evidentimin faktik të rasteve të kontrabandës dhe ndëshkimin e rrjeteve të përfshira./ Faktor.al
