Gjykata e Posaçme në Tiranë, ka rrëzuar kërkesën e kryebashkiakut Erion Veliaj, për zëvendësim të masës “arrest me burg”.
Kjo është e disata herë që Veliaj kërkon zëvendësim të masës, por të gjitha kërkesat janë rrëzuar. Veliaj ka argumentuar në seancën e sotme se nuk helmohen provat, hetimi ka mbaruar, nuk ekziston rreziku i ikjes, por gjyqtarja Etleva Deda, ka rrëzuar kërkesën e tij.
Sipas avokatit të Veliajt, është ofruar edhe garancia pasurore, apo edhe paraqitja 5 herë në javë, por sërish janë rrëzuar kërkesat.
“U kërkua garancia pasurore, u kërkuan disa masa, detyrim paraqitje 5 herë në javë, garancia pasurore, ndalimi jashtë shteti. Pra të gjitha masat që janë të përshtatshme për të mbarëvajtur hetimet, megjithëse këto rreziqe janë iluzionare. Nuk e ofruam me shumë të përcaktuar, e lamë në vlerësim të gjykatës, por duke qenë se u rrëzua kërkesa, nuk u shqyrtua ky opsion”, tha avokati.
Ndërkohë mësohet gjithashtu, se Erion Veliaj ka refuzuar avokaten e caktuar kryesisht nga gjykata dhe ka kundërshtuar çdo formë mbrojtjeje të realizuar prej saj, me argumentin se ajo nuk ka njohje reale mbi dosjen penale.
Erion Veliaj u arrestua më 10 shkurt 2025. SPAK ka ngritur ndaj Veliajt 13 akuza, përfshirë: korrupsion pasiv, pastrim parash, mosdeklarim të pasurisë, shpërdorim detyre dhe futje të sendeve në burg.
Sipas prokurorisë, shumica e akuzave lidhen me korrupsion pasiv, në 9 raste që përfshijnë disa kompani, të cilat sipas SPAK kanë dhënë përfitime të parregullta në formën e parave dhe pasurive të paluajtshme, duke marrë më pas leje ndërtimi dhe fonde publike nga Bashkia e Tiranës.
Edhe bashkëshortja e Veliajt, Ajola Xoxa, akuzohet gjithashtu për korrupsion pasiv në 9 raste në lidhje me subjekte tregtare dhe organizata jofitimprurëse, në të njëjtin kontekst si bashkëshorti i saj.
