Ministri i Drejtësisë, Besfort Lamallari, pasi dëgjoi me vëmendje kritikat e vazhdueshme të kryeministrit Edi Rama për numrin e lartë të të paraburgosurve në vend, thirri sot një konferencë të posaçme me fokus adresimin e problemit të paraburgimit në Shqipëri.
Në zbatim të urdhrave të kreut të qeverisë, i cili pasi SPAK kërkoi arrestimin e Ballukut u kujtua të deklarojë me zë të lartë se Shqipëria është kthyer në një vend me më shumë të paraburgosur sesa të burgosur, ministri i Drejtësisë Besfort Lamallari e ktheu këtë shqetësim në temë qendrore të konferencës së sotme.
“Të dhënat flasin qartë: përdorimi i tepruar i masës së paraburgimit nuk është vetëm një problem statistikor, por një problem thelbësor i të drejtave të njeriut dhe i prezumimit të pafajësisë.
Aktualisht, rreth 58% e personave në institucionet penitenciare janë të paraburgosur dhe qëndrimi mesatar i tyre në paraburgim është 253 ditë, krahasuar me 155 ditë në vendet e Bashkimit Evropian”, deklaroi ministri i Drejtësisë.
Ai shtoi se Shqipëria, si vend kandidat për Bashkimin Evropian, duhet të shkëputet nga politika e ashpër penale e trashëguar nga e kaluara dhe të afrohet me standardet evropiane, ndonëse prej 12 vitesh vendi drejtohet nga e njëjta forcë politike.
“Tema e kësaj konference na fton të bëjmë pikërisht këtë, dhe koha më e mirë është tani: Kodi i Ri Penal do duhet të reflektojë marzhet e dënimit të zbatueshme në Bashkimin Evropian për të njëjtat vepra penale; Kodi i Procedurës Penale, do duhet ndryshuar për të garantuar qartë dhe pa ekuivok të njëjtat garanci procedurale për lirinë dhe sigurinë e personit, sipas standardeve të Konventës Evropiane për të Drejtat e Njeriut dhe vendimet e Gjykatës Evropiane për të Drejtat e Njeriut”, deklaroi Ministri i Drejtësisë.
