Gazetari Almer Toska, i ftuar në studion e News24, ka deklaruar se në muajin shkurt mund të ketë ndryshime të mëdha në qeveri, për shkak të tensioneve të forta brenda mazhorancës dhe zhvillimeve që lidhen me hetimin e SPAK ndaj zv/kryeministres Belinda Balluku.
Ai pretendoi se ekziston një video komprometuese që, sipas tij, e bën kryeministrin Edi Rama të cenueshëm politikisht ndaj Ballukut. Toska tha se Balluku “di disa gjëra që e implikojnë Ramën” dhe kjo ka rritur ndikimin e saj në institucione të rëndësishme shtetërore.
Sipas gazetarit, nga mesi i shkurtit kryeministri mund të shkarkojë disa ministra, si pasojë e përplasjeve të brendshme në mazhorancë dhe situatës së krijuar pas hetimeve të SPAK.
“Përflitet se Rama është peng i Ballukut dhe ka video. Rama prej dy vitesh nuk firmos asnjë vendim të Këshillit të Ministrave.
Balluku di disa gjëra që e implikojnë Edi Ramën dhe kjo e bën Ramën të cenueshëm dhe të shkojë në gropë. Balluku ka filluar sot një lloj krehje të gjithë zyrtarëve në institucionet e rëndësishme që të vendosë njerëzit e saj të besuar.
Unë mendoj se në shkurt Balluku ka shënjestruar edhe ministra. Ajo nuk sheh dot me sy ministren e jashtme Spiropali. Ka raporte xhelozie, kundërshtime brenda llojit etj. Diçka tjetër përflitet se nga mesi i shkurtit Rama mund të shkarkojë gjysmën e ministrave me kërkesë të Ballukut”, tha ai.
