Në Rrugën e Dibrës, në Tiranë, Nefail Rodhe bleu një banesë me titull pronësie nga Ylli Beqiraj dhe pasi u lëshuan dhe u paguan faturat e truallit, kërkoi pajisjen me certifikatë pronësie.
“Shtëpinë e kam blerë në 2022 nga Ylli Beqiraj, me certifikatë pronësie ndërtimore. Ndërkohë, ishin në proces e faturat e tokës. Shkova tek noterja, bëra gjithë procedurat e duhura dhe në këstin e dytë, paguhen faturat e më kalonin mua të drejtat e Ylli Beqirajt që ka pasur pronën, kalonin në emrin tim. Kështu vepruam. Dolën faturat, bëm pagesat në shtet, në privat, ndërkohë Ylli Beqiraj më kaloi mua të drejtën që të vazhdoj unë me procedurat e pronës.
Përgjigjja që më erdhi nga hipoteka është që duhet t’i kërkoni një deklaratë firmës “Juventus Construction” për të vazhduar procedurat.
E pash që nuk ka zgjidhje në asnjë vend prandaj u drejtova te emisioni ‘Stop’ për problemin që kam”, u shpreh Rodhe.
Procesi u bllokua nga Kadastra, e cila kërkoi një deklaratë nga kompania “Juventus Construction”.
Administratori i firmës, Petrit Hasa, nuk e pajisi qytetarin me dokumentin, duke pretenduar, se toka ishte e bllokuar për ndërtim.
Administratori i firmës: Unë ia kam marrë pronarit të tokës, s’ka lidhje fare ai.
Gazetarja: Kush ka qenë pronari i tokës?
Administrator i firmës: Janë fisi Vathi, ia kena marr atij me përqindje dhe e kemi bllokuar atë, e kemi për ndërtim, i ka dalë leja. Por, tokën nuk e merr dot se është e pronarit të truallit.
Gazetarja: Ju keni dijeni që në fakt janë paguar faturat e shpronësimit për pronarët e truallit?
Administrator i firmës: S’më intereson fare, ai shkon i çon në Gjykatë, i kthen mbrapa lekët. Si do ta marr shtëpinë tënde ty unë tani? Ti po kërkon të drejtën tënde, pronari i tokës e ka me certifikatë. Unë të jap numrin e telefonit të Vathit dhe merre në telefon! Unë nuk kam lidhje fare me atë, unë kam punë vetëm me pronarët e truallit.
Gazetarja: Ngaqe del ti aty, del “Juventus Construction”.
Administratori i firmës: Ia kam blloku pronën, pronarëve të truallit, unë do shpenzoj lekë, si do të mbrohem?!
Pas ndërhyrjes së emisionit “Stop” dhe verifikimeve nga Kadastra, u konstatua, se të gjitha procedurat ishin kryer përpara kontratës me firmën e ndërtimit, ç’ka çoi në pajisjen e Nefail Rodhes me certifikatën e truallit, duke i dhënë zgjidhje një problemi, që zgjati mbi dy vjet./ Emisioni Stop
