Problematika e radhës e publikuar në emisionin “Stop” në Tv Klan, këtë të mërkurë, më 20 maj, trajton denoncimin e qytetarit, Arben Myzeqari, në lidhje me një histori të gjatë përplasjesh ligjore dhe administrative në Fier, ku denoncuesi pretendon se, megjithëse pagoi rreth 113 milionë lekë për blerjen dhe legalizimin e një prone përmes ALUIZNI-t, sot ka mbetur pa pronën dhe pa paratë e tij.
Sipas tij, gjithçka nisi në vitin 2005, kur familja bëri vetëdeklarimin e objektit, një tavernë në Fier.
“Pikërisht në këtë vend ku jemi ne, ka qenë një objekt ekonomik, që ishte një aktivitet familjar, i imi i nënës dhe i vëllait.Kemi bërë vetëdeklarimin e këtij objekti për legalizim në Bashkinë e Fierit atëherë dhe një vit më pas procedurat kaluan nga bashkia tek ALUIZNI.”
Më pas, në vitin 2011, ai nënshkroi kontratën me ALUIZNI-n dhe kreu pagesën për kalimin e pronës në emrin e tij, duke pritur legalizimin përfundimtar dhe certifikatën e pronësisë.
“Kemi paguar taksën e infrastrukturës 370 mijë lekë për objektin dhe një muaj e gjysmë mbrapa kemi paguar 113 milionë lekë. Shitësi në këtë rast ishte ALUIZNI Fier dhe blerësja ishte nëna ime e ndjerë, Marinaqi Pelari. Institucioni garantonte dhënien e lejes së legalizimit dhe certifikimin e kësaj prone, të truallit dhe të objektit. I kemi paguar direkt në dorë 113 milionë lekë me gjithë taksën e bankës.”
Por, ndërsa procesi ende nuk kishte përfunduar, një palë tjetër, që pretendonte pronësinë e truallit, ngriti padi për lirimin dhe dorëzimin e pronës. Sipas Myzeqarit, çështja u shqyrtua në të tre shkallët e gjyqësorit dhe gjykatat nuk i dhanë të drejtë palës paditëse, duke lënë në fuqi pretendimin e tij mbi objektin.
“Çudia më e madhe është se mirë që më kanë marrë truallin që e kam blerë 113 milionë lekë dhe ajo ka vajtur katërfish sot, pa marrë parasysh vuajtjet dhe avokatët që kemi paguar, por ka marrë dhe objektin. Unë s’kam pronë sot.”
Megjithatë, konflikti mori një tjetër kthesë në vitin 2018, kur objekti u shemb me urdhër të kryetarit të Bashkisë së Fierit.
Pas prishjes së ndërtesës, në zonë u dha leje për një ndërtim të ri, ndërsa Myzeqari pretendon, se ai nuk mori asnjë kompensim dhe nuk iu kthyen paratë e paguara për legalizimin. Ai thotë, se ka depozituar kallëzime penale ndaj zyrtarëve, që i konsideron përgjegjës për këtë situatë dhe se projekti i ndërtimit është pezulluar pikërisht për shkak të këtyre procedimeve.
“Për mua kjo ishte nje vjedhje dhe kam bërë kallzim penal në Prokurorinë e Fierit… Të gjitha çështjet dhe ato që kam çuar në SPAK , kanë ardhur në Prokurorinë e Fierit dhe Prokuroria e Fierit është totalisht hermetike. Nuk e di ku mund t’i gjej paratë, kur s’i gjen prokuroria…”
Prej vitesh ai endet nëpër gjykata dhe institucione, ndërsa ende nuk ka marrë një përgjigje, se çfarë ndodhi me pronën dhe me shumën, që pagoi.
/Emisioni STOP
