Rusia nuk ka ndërmend të zhvillojë asnjëherë bisedime me shefen e politikës së jashtme të Bashkimit Evropian, Kaja Kallas, dhe Moska do të presë thjesht largimin e saj nga posti. Kështu është shprehur zëdhënësi i Kremlinit, Dmitri Peskov.
“Si mund të diskutosh për çfarëdo gjëje me Kaja Kallas? Ne nuk do të diskutojmë kurrë asgjë me të. As amerikanët nuk do të diskutojnë ndonjë gjë me të, dhe kjo është e qartë. Çfarë mund të bëjmë? Duhet thjesht të presim derisa ajo të largohet nga posti”, deklaroi Peskov në një intervistë për gazetarin e televizionit shtetëror rus, Pavel Zarubin. Komentet u bënë publike sot.
Në të njëjtën kohë, zëdhënësi i Kremlinit tha se forcat e armatosura ruse po ndjekin nga afër planet e Shteteve të Bashkuara për sistemin e mbrojtjes raketore të quajtur “Golden Dome” (Kuba e Artë), përfshirë aspektet që lidhen me Grenlandën.
“Çfarë lloj kube do të jetë? Kundër cilave kërcënime do të projektohet? Nuk kam asnjë dyshim se forcat tona të armatosura do t’i monitorojnë me kujdes dhe do t’i analizojnë këto plane”, theksoi Peskov.
