Një i burgosur ka ndërruar jetë këtë të shtunë pasi u dërgua në spital. Bëhet fjalë për shtetasin Nicolae Ionnut Erion Deliver, 20 vjeç, me origjinë nga Rumania dhe banues në Shkodër.
Sipas informacionit paraprak, gjatë paradites ai është konstatuar në gjendje të rënduar shëndetësore në ambientet e institucionit dhe është transportuar drejt Spitalit të Koplikut për trajtim mjekësor. Më pas, mjekët kanë konstatuar se ka ndërruar jetë.
I riu ishte arrestuar në tetor të vitit 2024 për veprat penale “vjedhje me dhunë” dhe “prodhim dhe shitje të lëndëve narkotike”.
“Sipas informacionit paraprak, gjatë paradites së sotme, shtetasi është konstatuar nga personeli i shërbimit duke qëndruar në shtrat, ç’ka ka sjellë njoftimin e menjëhershëm të personelit shëndetësor të institucionit.
Pas vlerësimit mjekësor, janë konstatuar parametra jetësorë të ulët dhe i është dhënë ndihma e parë mjekësore, me rekomandim për dërgim të menjëhershëm në urgjencën e spitalit rajonal”, shpjeguan Burgjet.
