Kryeministri i Groenlandës, Jens-Frederik Nielsen, ka deklaruar se çdo diskutim që vë në pikëpyetje sovranitetin e Groenlandës është i papranueshëm, duke theksuar se integriteti territorial është “vijë e kuqe” e panegociueshme.
Duke folur për gazetarët në kryeqytetin Nuuk, Nielsen u pyet për skenarët e përfolur mbi kërkesa të mundshme të Shtetet e Bashkuara të Amerikës për kontroll apo sovranitet mbi pjesë të territorit të Groenlandës. “Jemi të gatshëm të diskutojmë dhe të forcojitë bashkëpunimin, por sovraniteti është vijë e kuqe”, tha ai.
Kryeministri shtoi se “integriteti ynë, kufijtë tanë dhe e drejta ndërkombëtare” nuk mund të vihen në diskutim, duke e cilësuar retorikën e vitit të kaluar mbi blerjen e Groenlandës si “të papranueshme”. Sipas tij, deklarata të tilla kanë krijuar pasiguri te banorët e ishullit.
Nielsen bëri të ditur se nuk ka ende detaje për një “marrëveshje të ardhshme” të përmendur nga presidenti amerikan Donald Trump, duke nënvizuar se çdo bashkëpunim i mundshëm me SHBA-në duhet të zhvillohet vetëm brenda kuadrit të respektimit të sovranitetit, kufijve dhe ligjit ndërkombëtar.
Nga ana e saj, ministrja e Jashtme e Groenlandës, Vivian Motzfeldt, i përshkroi zhvillimet në Forumi Ekonomik Botëror si “pozitive”, por theksoi se pasiguria mbetet. Ajo konfirmoi se është zhvilluar një takim me ministrin danez të Mbrojtjes, Troels Lund Poulsen, dhe Sekretarin e Përgjithshëm të NATO-s, Mark Rutte, për të përcaktuar qartë “vijat e kuqe”.
Sipas Motzfeldt, nuk ka asnjë marrëveshje zyrtare për Groenlandën, dhe qëndrimi i qeverisë është përcjellë te Uashingtoni përmes kanaleve diplomatike. Ajo shtoi se ky komunikim përbën një sinjal pozitiv nga Davosi.
