Pamje të rënda vijnë nga Greqia, ku moti i keq me stuhi të forta shiu dhe reshje të dendura dëbore ka shkaktuar përmbytje të mëdha në disa zona të vendit. Autoritetet greke kanë shpallur gjendjen e emergjencës që prej ditës së djeshme, duke vendosur alarm të kuq në shtatë rajone, përfshirë edhe Athinë.
Shkollat janë mbyllur, ndërsa policia u ka bërë thirrje qytetarëve të shmangin lëvizjet e panevojshme. Reshjet e rrëmbyeshme kanë bërë që lumenjtë dhe përrenjtë të dalin nga shtrati, duke përmbytur rrugë dhe lagje të tëra, të mbuluara nga balta dhe uji.
Situata më problematike raportohet në zonën e Ano Glyfada, ku rruga kryesore është shndërruar në një lumë të vërtetë. Siç shihet edhe në pamjet e publikuara, makinat janë marrë përpara nga rrjedha e fortë e ujit, duke lundruar në mes të rrugës.
Moti i keq ka prekur rëndë gjithë rajonin e Atikës, me Athinën në qendër të stuhisë. Rrebeshët intensivë kanë shkaktuar dëme të shumta materiale dhe probleme serioze në qarkullimin rrugor, ndërsa autoritetet vijojnë monitorimin e situatës dhe ndërhyrjet emergjente në zonat më të prekura.
