Sot përfundoi gjyqi për padinë për shpifje që Adriatik Lapaj, kreu i “Shqipëria Bëhet”, i kishte bërë Agron Shehajt, kreut të Partisë Mundësia.
Gjykata e shpalli Shehajn fajtor për fyerje duke e dënuar me një gjobë prej 300 mijë lekësh (ose 3 milionë lekë të vjetra).
Kujtojmë se Shehaj kishte hedhur akuza të rënda ndaj Lapajt. Në shkurt të vitit të kaluar, ai e akuzoi Lapajn si sekser dhe manipulues pronash në jug të vendit dhe hodhi akuza për lidhje me krimin e organizuar.
Ndërkohë me anë të një reagimi në rrjetet sociale, Lapaj, thekson se pretendimet e Shehajt para zgjedhjeve, për të cilat sot u dha vendimi penal, i kanë shërbyer drejtpërdrejt kryeministrit Edi Rama, në një kohë kur ai vetë ndodhet prej javësh në shesh, duke e akuzuar qeverinë për korrupsion dhe kapje të shtetit.
Ai shtoi se ndihet krenar për përballjen e tij politike, duke theksuar se po lufton në çdo front kundër, sipas tij, atyre që i shërbejnë vjedhjes dhe kapjes së shtetit nga një pakicë njerëzish.
“Sot Gjykata e posacme e dënoi penalisht deputetin Agron shehaj për çka kishte pretenduar përpara zgjedhjeve të 11 majit. Cka ai pretendoi para zgjedhjeve të 11 majit I shërbeu në mënyrë ekzemplare Edi Ramës kundër të cilit prej javësh ndodhem në shesh për akuzat për korrupsion që e kanë kapluar qeverinë e tij.
Sot ndihem krenar përballë secilit prej jush që po luftoj në cdo front përballë të gjithëve atyre që po I shërbejnë vjedhjes dhe kapjes së shtetit nga një pakicë njerëzish.
Në datën 31 janar në orën 6 të pasdites masivisht në shesh kundër qeverisë më të korruptuar të Europës dhe të atij që drejton ekipin më të korruptuar në Shqipëri” – tha Lapaj.
