Emisioni “Stop” në Tv Klan ka trajtuar disa herë raste të denoncuara ndaj shtetases Kaltra Toti, e cila prezantohet si përfaqësuese e një agjencie punësimi për Gjermaninë.
Gjatë dy viteve të fundit disa infermiere mami kanë denoncuar, se janë mashtruar me premtime për punësim jashtë vendit, duke dorëzuar shuma të konsiderueshme parash pa marrë asnjë rezultat.
“Kam mbaruar studimet për infermieri-mami në vitin 2021. Kam kërkuar për një punë si infermiere në Gjermani, kam kontaktuar me Kaltra Totin dhe më ka premtuar një vend pune. E kam bërë aplikimin në vitin 2024, më 30 qershor dhe më ka premtuar që brenda 6 muajve unë do të isha në Gjermani, në një vend pune si infermiere. Kanë kaluar pothuajse 2 vite dhe akoma asgjë”, thotë denoncuesja.
Një rast i ri vjen nga një infermiere mami, e diplomuar në vitin 2021, e cila në vitin 2024 u njoh me Kaltra Totin përmes rrjeteve sociale. Sipas saj, Kaltra Toti i premtoi punësim të shpejtë në Gjermani dhe ajo i dorëzoi 1 mijë euro, me garancinë se brenda 6 muajsh, do të nisej për punë.
Sot, në vitin 2026, ajo vijon të jetë në Shqipëri, ndërsa afatet janë shtyrë vazhdimisht së fundmi me premtimin për muajin maj. Qytetarja kërkon kthimin e parave, pasi ka humbur çdo besim.
“Përshëndetje, Stopi! Jam Infermiere e Shkencave Infermierore Mami, kam mbaruar Universitetin e Shkodrës dhe kam punuar prej disa kohësh në spitale private në Tiranë. Rastësisht, në rrjete sociale, teksa po kërkoja një rrugë, për t’u punësuar në Gjermani, shoh në marketingun e faqeve të këtyre kompanive të ndërmjetësimit, kompaninë, e cila drejtohej nga zonjushë Kaltra Toti. Filluam kontaktet. Sapo u prezantuam, goca menjëherë, të bëni pagesat, për të hyrë, për t’u regjistruar. Aty tha, do t’ju punësojmë të katërta. Ok! Ramë dakord! Shuma ishte 1 mijë euro. Në momentin, që mori lekët, ra në një pauzë. Katër muaj, deri në gjashtë. Nga maji i vitit 2024, dhe deri më sot. Në momentin, që ne hoqëm dorë dhe kërkonim pagesat mbrapsht, përgjigjja ishte, që përgjegjësi është dikush tjetër. Prandaj i jam drejtuar emisionit “Stop”, për të zgjidhur këtë problem!”, denoncoi qytetarja tjetër.
Pas ndërhyrjes së emisionit “Stop”, zonja Toti ktheu paratë, që kishte marrë./ Emisioni STOP
