Kreu i lëvizjes Shqipëria Bëhet, Adriatik Lapaj, ka bërë thirrje për pjesëmarrje masive në protestën që do të mbahet të shtunën në orën 18:00, përpara Kryeministrisë.
Duke folur në emisionin Kjo Javë, nga sheshi ku ai dhe mbështetësit e tij ndodhen prej 41 ditësh, Lapaj tha se protesta synon të tregojë kundërshtimin ndaj korrupsionit dhe asaj që ai e cilësoi si “hajdutëri”.
Sipas tij, qëllimi final i protestave është që qytetarët të imponojnë krijimin e një qeverie tranzitore 12-mujore, e përbërë nga intelektualë dhe jo nga përfaqësues të partive politike.
Lapaj: Si duket e ka maçin në barkë. Ne jemi njerëz që jemi formuar mbi ligjin dhe rregullin. Protesta e ka fuqinë te qëndresa dhe jo rrugaçëria. E ka maçin në barkë. Nesër në orën 6 i ftoj gjithë qytetarët e Tiranës dhe Shqipërisë. Të dalin masivisht me fëmijët me gratë. Të distancohen nga hajdutëria. Reagimi të jetë në shesh. Duhet të dëshmojmë se nuk jemi dakord me hajdutërinë. Fuqia e protestës jonë është qëndresa, mesazhi. Këto 5 javë jemi protestues nuk kemi cenuar një lule te kryeministria. Por jemi protesta më e sulmuar këto vite pasi kemi 19 të procedura, 13 vetëm në 4 janar.
Mesazhi i qartë, në krah të drejtësisë, kundër korrupsionit, hajdutërisë. Për meritokracinë. Podiumi është i hapur dhe i lirë. Qëllimi i kësaj që po ndodh në këto 5 javë është imponimi nga ana e popullit një qeveri tranzitore 12 mujor, me intelektualë me paketë reformash në zgjedhje të lira dhe të ndershme. Që Rama të mos ketë më monopolin e ministrisë së brendshme, të mos bëjë presion për votën të mos e ketë në funksion të tij buxhetin e shtetit me paratë e shtetit.
