Gjykata Kushtetuese ka pranuar të shqyrtojë ankimin e Erion Veliajt, lidhur me kërkesën për heqjen e masës së sigurisë të vendosur nga SPAK.
Sipas Euronews Albania, Kolegji kompetent i Gjykatës Kushtetuese, i mbledhur sot, e ka kaluar çështjen për shqyrtim në seancë. Ende nuk është caktuar data se kur do të mbahet seanca.
Kërkesa e Veliajt vjen pasi më 31 tetor, Gjykata Kushtetuese rrëzoi vendimin e Këshillit Bashkiak të Tiranës për shkarkimin e tij nga detyra.
Veliaj akuzohet për korrupsion në nëntë raste, për pastrim parash dhe për fshehje pasurie përmes OJF-ve, kompanive të afërmve dhe tenderëve të dhënë në këmbim të investimeve private.
SPAK thotë se ai dhe bashkëshortja e tij kanë përfituar rreth 1.1 milionë euro dhe vila në bregdet.
