Taulant Balla, foli sot në mbledhjen e grupit parlamentar të PS që po zhvillohet në Pallatin e Brigadave.
Balla deklaroi se zgjedhjet vendore të ardhshme do të zhvillohen në periudhën 15 prill -15 maj 2027, duke theksuar se Presidenti do të dekretojë datën zyrtare në fillim të sesionit të tretë parlamentar, në vjeshtë.
“Në fillim të sesionit të tretë parlamentar, që i bie diku në vjeshtë, do dekretohet nga Presidenti i Republikës data e zgjedhjeve vendore 2027”, tha ai.
Ndërkohë Balla vuri afatin sa i takon punës për Reformën Zgjedhore dhe atë Territoriale. Ai deklaroi se Reforma Zgjedhore duhet finalizuar në korrik 2026.
“Reforma Zgjedhore duhet finalizuar në korrik 2026. Në zgjedhjet vendore të 2027-ës duhet të shkojmë me ndarjen e re administrativo-territoriale. Prandaj, komisioni i posaçëm duhet të ketë sjellë për votim Brenda kësaj legjislature ndarjen e re e cila të udhëhiqet nga nevoja e thellimit të reformës aktuale duke reflektuar edhe ndryshimet shumë domethënëse të këtyre viteve, qoftë nga demografia, por edhe teknologjia.”
Pavarësisht se formula e bashkëdrejtimit të dy komisioneve të posaçme parlamentare është dakordësuar nga dy partitë më të mëdha në vend, Balla tha se “nuk mund të vijohet njësoj nëse nuk ka konsensus për të punuar”.
