Kolegji i Posaçëm i Apelimit, KPA vendosi të enjten më 15 janar lënien në fuqi të shkarkimit nga detyra të prokurores së Tiranës, Ornela Rrumbullaku.
Vendimi u mor në mënyrë unanime nga trupi gjykues i Kolegjit, i kryesuar nga Albana Shtylla, me relatore Natasha Mulaj dhe anëtarë, Sokol Çomo, Ina Rama e Rezarta Schuetz, pas shqyrtimit në dhomë këshillimi të ankimit të Rrumbullakut kundë vendimarrjes së Komisionit. Vendimi i KPA është përfundimtar dhe ka efekt të menjëhershëm.
Prokurorja e Tiranës, Ornela Rrumbullaku u shkarkua më 4 shtator të vitit 2024 nga ana e Komisionit të Pavarur të Kualifikimit, pasi u konkludua se kishte mungesë të burimeve financiare të ligjshme për të justifikuar pasuritë. Për pastërtinë e figurës dhe profesionalizmin nuk u gjetën probleme.
Ornela Rrumbullaku përfundoi studimet e Magjistraturës në vitin 2006 dhe pas një periudhe stazhi në Prokurorinë e Tiranës, u emërua në Prokurorinë e Rrethit Kavajë. Në vitin 2019 ajo u komandua si këshilltare pranë Këshillit të Lartë të Prokurorisë. Më vonë u emërua në Prokurorinë e Tiranës, ku ushtroi detyrën deri në momentin e shkarkimit./BIRN
