Presidenti francez Emmanuel Macron ka paralajmëruar se çdo tentativë për shkeljen e sovranitetit të Groenlandës do të prodhojë pasoja serioze dhe efekte zinxhir për Europën dhe aleancat perëndimore.
Gjatë mbledhjes së kabinetit të qeverisë këtë të mërkurë, Macron deklaroi se një veprim i tillë do të përbënte “shkelje të sovranitetit” dhe se pasojat e tij do të ishin “të paprecedenta”, me ndikime që do të shtriheshin përtej rajonit arktik.
Sipas mediave ndërkombëtare, kreu i shtetit francez nënvizoi se Parisi nuk i nënvlerëson deklaratat dhe lëvizjet politike që po bëhen rreth Groenlandës, një territor autonom nën Mbretërinë e Danimarkës, i cili së fundmi është rikthyer në vëmendje për shkak të deklaratave të administratës amerikane.
Macron theksoi se prekja e sovranitetit të një territori evropian ose aleat pasqyron “rrezik real” për rendin ndërkombëtar dhe për sigurinë politike në kontinent. Ai tha se Franca po ndjek me kujdes të gjitha zhvillimet dhe është e përgatitur të veprojë në koordinim të plotë me Danimarkën dhe partnerët e tjerë evropianë.
“Franca do të mbrojë sovranitetin dhe integritetin e vendeve aleate dhe nuk do të lejojë që precedentë të tillë të krijojnë një efekt zinxhir në Evropë,” shkruajnë mediat, duke cituar Macron-in.
