Protestues në Iran kanë raportuar përdorim ekstrem force nga autoritetet, ndërsa përplasjet mes qytetarëve dhe forcave të sigurisë po shndërrohen në një nga episodet më të përgjakshme të viteve të fundit. Sipas të dhënave të Organizatës për të Drejtat e Njeriut në Iran (IHRNGO), të paktën 648 persona janë vrarë që nga nisja e protestave, mes tyre nëntë të mitur.
Një protestues, i identifikuar si Omidi, rrëfeu për BBC se forcat iraniane qëlluan drejt turmës pa paralajmërim.
“Ishte e tmerrshme. Ata qëlluan drejtpërdrejt. Njerëzit ranë aty ku qëndruan,” tha ai, duke shtuar se protestuesit ishin të paarmatosur.
Raportime të tjera tregojnë se situata është përkeqësuar pas thirrjeve të Reza Pahlavit, djalit të shahut të fundit të Iranit, i cili u rrëzua nga pushteti në vitin 1979. Pas daljes së mijëra qytetarëve në rrugë, autoritetet ndërprenë aksesin në internet dhe dërguan trupa të Gardës Revolucionare dhe njësive paraushtarake Basij për të shtypur protestat.
Një protestuese nga Teherani e përshkroi ditën e përplasjes si “ditë gjykimi”:
“Në luftë, të dyja palët kanë armë. Këtu vetëm ne këndojmë dhe vritemi. Është një luftë e njëanshme.”
Dëshmitarët thonë se forcat përdorën municion të vërtetë, armë automatike dhe dhunë fizike edhe pas shpërndarjes së turmave. Në Fardis, afër Teheranit, protestues raportuan se janë qëlluar pa praninë e policisë në terren.
Ndërkohë, spitalet në zonat kryesore janë të mbingarkuara, duke hasur vështirësi në trajtimin e të plagosurve me dëmtime të rënda, përfshirë plagë në kokë dhe sy. Punonjës shëndetësorë raportojnë se nuk mund të ndihmojnë të gjithë pasi lëndimet janë masive.
Ka pretendime edhe për varrime të shpejta pa identifikim. Një punonjës morgu në Mashhad tha se 180-200 trupa janë varrosur menjëherë, ndërsa raste të ngjashme raportohen në Rasht dhe Teheran.
Pamje të publikuara në Telegram tregojnë dhjetëra trupa të rreshtuar në qendra ligjore dhe kamionë duke transportuar kufoma, duke theksuar përmasën e ngjarjes.
