Janë zbardhur detaje të reja nga zjarri që dy ditë më parë shkatërroi magazinat pranë tregut të “5 Majit”, në zonën e njohur si ish-uzina “Dinamo”.
Sipas Prokurorisë së Tiranës, nga hetimet paraprake dyshohet se zjarri ka ardhur si pasojë e një shkëndije elektrike, e cila përfshiu me shpejtësi kapanonet ku tregtarët mbanin mallra e produkte për shitje.
Ngjarja ndodhi më datë 8 janar, në rrugën “Ferit Xhajko”, dhe ka shkaktuar dëme të mëdha materiale. Megjithëse nuk pati të lënduar, shumë tregtarë humbën mallrat e tyre, ndërsa rrethinat u mbuluan nga tymi dhe flakët për më shumë se një orë.
Ndërkohë, pronarët e bizneseve të cilët kanë pësuar dëme kolosale kanë akuzuar Policinë dhe shërbimin zjarrfikës se nuk kishin mjetet e nevojshme për të ndërhyrë në kohë për shuarjen e flakëve.
Ata thonë se zjarri mund të ishte izoluar më shpejt dhe dëmet të ishin më të vogla, nëse forcat e emergjencës do të kishin mbërritur me pajisje të përshtatshme.
