Kreu i Partisë Demokratike, Sali Berisha, po zhvillon këtë të premte një Dëgjesë Publike me partitë opozitare, aktorë të shoqërisë civile, përfaqësues të sindikatave, organizatave, medias dhe intelektualë publikë.
Gjatë fjalës së tij, Berisha tha se “Narkoshteti” shqiptar është kthyer sot në rrezik për Europën! Ai shton më tej se ky narkoshtet u krijua nga qeveria aktuale dhe Edi Rama për qëllimet më ogurzeza ndaj Shqipërisë dhe shqiptarëve.
Kryedemokrati thekson se Shqipëria zyrtare është sot koka e karteleve më të fuqishme të drogës në Europë për dy arsye. Së pari, sipas OKB, Shqipëria është eksportuesi kryesor i kanabisit në BE. Së dyti, zhvillimet e këtyre dy viteve të fundit kanë faktuar në mënyrë të pakundërshtueshme se trafikantët shqiptarë, kartelet shqiptare të kokainës përcaktojnë çmimin e këtij helmi në Europë.
Për Ergys Agasin, Berisha tha se kishte aq “fuqi’ në qeverinë e drejtuar nga Edi Rama sa “ka larguar nga detyra 3 ministra të brendshëm”.
Teksa merr në mbrojtje Fatmir Xhafën, Bledi Çuçin dhe Ervin Hoxhën, Berisha pretendon se ata janë shkarkuar padrejtësisht nga krimi i organizuar me firmën e Ramës.
Sipas kësaj deklarate të paqartë dhe që ngre shumë pikëpyetje mbi interesat reale të Berishës, i bie që ministrat e Ramës kanë qenë kundër krimit të organizuar?!
“Kanë futur në parlament 28 deputetë, me listë, ato marrin çdo vendim dhe emërojnë çdo ministër. Ergys Agasi për llogari të bandave dhe të tij ka larguar nga detyra 3 ministra të brendshëm. Njeriu më i afërt në çdo aspekt i Ramës. Që merrte pengje për Edi Ramën dhe që organizon t’i sjellë peng edhe Ahmetajn për shkak të denoncimeve që i bën ai nga Lugano”, tha Berisha.
