Gazeta prestigjioze austriake Salzburger Nachrichten i ka kushtuar një artikull Ambasadorit të Shqipërisë në Austri, Fate Velaj.
Nën titullin “Nga pjatalarës në diplomat të nivelit të lartë”, ajo përshkruan rrugëtimin e tij që nga viti 1991: etapat kryesore të jetës si emigrant, shndërrimin në piktor, fotograf, shkrimtar dhe krijues politikash kulturore për Bashkimi Evropian, si edhe rikthimin e tij si ambasador, i cili po gjallëron marrëdhëniet mes përfaqësive diplomatike në Vjenë.
Kujtojmë se vetëm pak kohë më parë, Fate Velaj, prezantoi romanin e tij “Kreuztanne” gjatë Panairit të Librit në Vjenë. Libri trajton përvojat e autorit si refugjat dhe jetën e tij në Austri, duke përfshirë kohën në kampin e Traiskirchen dhe strehimin në Gasthaus zur Kreuztanne.
Romanin “Kreuztanne” Velaj e përshkruan si rrugëtimin e tij personal drejt integrimit dhe jetës profesionale në Austri, duke ndarë përvojat dhe sfidat me publikun.
