Nicolás Maduro dhe bashkëshortja e tij, Cilia Flores, po mbahen aktualisht në Metropolitan Detention Center (MDC) në Brooklyn të Nju Jorkut, një institucion federal i cili është kritikuar prej vitesh për kushtet e tij të vështira.
Sipas avokatëve amerikanë dhe raportimeve mediatike, MDC është përshkruar si “ferri mbi tokë”, për shkak të mbipopullimit, mungesës së stafit dhe episodeve të shpeshta dhune brenda ambienteve të tij. Ish-Prokurorja e Përgjithshme e Nju Jorkut, Letitia James, ka deklaruar më herët se kushtet në këtë burg janë “të papranueshme dhe çnjerëzore”.
Edhe gjyqtarë federalë kanë shprehur shqetësime për situatën në MDC, duke theksuar se në institucion mbizotëron kaos dhe dhunë e pakontrolluar. Në disa raste, autoritetet gjyqësore kanë hezituar të dërgojnë të pandehur ose të dënuar në këtë burg, pikërisht për shkak të kushteve të sigurisë dhe trajtimit.
Megjithatë, MDC mbetet burgu i vetëm federal në qytetin e Nju Jorkut dhe përdoret shpesh për të mbajtur të burgosur me profil të lartë. Mes tyre ka qenë edhe ish-presidenti i Hondurasit, Juan Orlando Hernández, i cili u përball me akuza për trafik droge. Në këtë institucion janë mbajtur gjithashtu edhe Ghislaine Maxwell si dhe reperi Sean Combs.
Autoritetet amerikane nuk kanë dhënë ende detaje të mëtejshme mbi regjimin e sigurisë apo kushtet konkrete të paraburgimit për Maduron dhe bashkëshorten e tij.
