Ka nisur protesta e organizuar nga kreu i Shqipëria Bëhet, Adriatik Lapaj, para Kryeministrisë. Qytetarë të shumtë janë mbledhur në shesh, duke kërkuar dorëheqjen e kryeministrit Edi Rama.
Protestuesit mbajnë pankarta me thirrje si “Edi Rama jep dorëheqjen” dhe “Edi Rama o hajdut”.
Lapaj gjatë fjalës së tij në protestë, u shpreh se 83 mandatet e Ramës, kanë zero vlerë sepse populli e di të vërtetën që ata i vjedhin.
Ai tha gjithashtu se regjimi hajdut i Ramës nuk ka dërguar asnjë ambulancë në protestë dhe shtoi se “për ata ne jemi njerëz që nuk duhet të ekzistojmë”. Lapaj nënvizoi se këta kanë blerë 10 mln euro çokollata, por buxheti kundër kancerit nuk është 10 mln euro në këtë vend.
“Erdhi për të zhbërë modelin e oligarkisë së Berishës, por nuk është zhbërë…jemi këtu për të kërkuar dorëheqjen e njeriut më të korruptuar në Europë. A ja dha populli 83 mandate që ta vjedhë? Ato mandate kanë zero vlerë sepse populli e di të vërtetën që ata na vjedhin. Ju këtu jeni njerëz të lirë, shqiptarët janë njerëz që meritojnë të jetojnë me dinjitet. Kemi 27 net që flemë në këtë shesh.
Regjimi hajdut i Ramës nuk ka dërguar asnjë ambulancë…Për ata ne jemi njerëz që nuk duhet të ekzistojmë…Këta kanë blerë 10 mln euro çokollata, por buxheti kundër kancerit nuk është 10 mln euro në këtë vend. Me një firmë të zv/kryeministres kanë vjedhur 50 mln euro, ndërsa fëmijët në shkolla dridhen nga i ftohti”, tha Lapaj nga protesta.
Më herët, Policia e Tiranës njoftoi masat e marra për garantimin e rendit dhe sigurisë gjatë tubimit. Sipas policisë, nga ora 11:00 deri në përfundim të protestës, do të ketë bllokime të pjesshme të qarkullimit në Bulevardin “Dëshmorët e Kombit”, në segmentin nga Ura e Dajtit deri te kryqëzimi me rrugën “Ismail Qemali”.
Në varësi të zhvillimit të tubimit, mund të ketë kufizime edhe në akse të tjera rrugore.
