Kreu i “Shqipëria Bëhet”, Adriatik Lapajt së bashku me mbështetësit e tij është rikthyer para Kryeministrisë. Pas tensioneve të regjistruara mesditën e kësaj të diele, ku gjatë protestës të organizuar nga vetë ai u përplas me efektivët e Policisë, Lapaj ka treguar që nuk do të ndalet.
Ndonëse efektivët i hoqën çadrën e vendosur poshtë zyrës së kreut të qeverisë, ai ka vendosur që të ngrejë një tjetër dhe të vijojë qëndresën e tij e cila është futur në ditën e 28-të.
Ai vijoi t’u bëjë thirrje qytetarëve që t’i bashkohen dhe të luftojnë përballë “hajdutëve” dhe të kërkojnë të drejtën e tyre.
“Nuk e mendoja që do të rezistoja kaq gjatë. Nuk e mendoja që njerëzit do të marroseshin, në thonjëza, dhe do të vinin të flinin këtu. Ai e di vetë sa e vështirë është sepse ka ngritur vetë çadër. Dhe është shqetësuar shumë dhe nuk na lejon ne të vendosin çadra këtu. Nëse secili nga ju mendon vetëm për vete, oborrin e vet, rrogën e vet, një ditë në një mënyrë ose tjetrën do të jeni subjekt i këtij dhunimi.
Ti je kujtuar vetëm kur ke hallin ti, mishin do ta hash me hormone, ato frutat do ti hash me pesticide, shtëpinë do të vijnë të ta prishin kur të duan ata, dhe nuk do jetë askush për ty siç dhe nuk ka qenë.
Pronën do ta vjedhin siçta kanë vjedhur dhe askush nuk do jetë për ty. Fëmijën do ta largojnë këta, siç ta kanë larguar, e askush nuk do të thotë gjë, ashtu si dhe ti nuk the asgjë pasi mendove për rrogën, për precendimin. E ti ke frikë. Frikë për çfarë? Të thuash që duhen pensione më të mira, subvencione, shpërblime. Për çfarë ke frikë? Të thuash që na duhen ilaçe në spitale dhe të mos falemi në Kisha dhe Xhamie kur kemi hall. Aty të falemi por jo për të kërkuar lekë, por për të kërkuar mëshirën e të madhit Zot”, tha Lapaj ndër të tjera.
