Sekretari amerikan i Shtetit, Marco Rubio, po shfaqet si figura qendrore në menaxhimin e situatës në Venezuelë pas arrestimit të presidentit Nicolás Maduro nga forcat amerikane.
Sipas një artikulli të Bloomberg, Rubio ndodhet në qendër të zhvillimeve, ndërsa Uashingtoni përballet me sfidën e hartimit të një strategjie për një vend pa udhëheqje politike dhe pa një plan zyrtar tranzicioni.
Ndërkohë, Washington Post, në një shkrim me titullin “Rubio në rolin më kërkues deri më sot: Regjent i Venezuelës”, thekson se shefi i diplomacisë amerikane ka pasur një rol vendimtar në planifikimin e rrëzimit të Maduro-s dhe se presidenti Donald Trump po mbështetet tek ai për të ndihmuar në “administrimin” e Venezuelës, menaxhimin e rezervave të saj të naftës dhe nisjen e një qeverie të re.
Bloomberg raporton se Trump po i beson Rubios koordinimin politik dhe diplomatik të lëvizjeve amerikane në një moment tejet kompleks. Në tryezë janë çështje të ndjeshme si stabilizimi i vendit, administrimi i burimeve energjetike, regjimi i sanksioneve dhe mundësia e zhvillimit të zgjedhjeve, në një Venezuelë që mbetet thellësisht e përçarë politikisht.
Megjithatë, vetë Rubio deklaroi të dielën se SHBA nuk synojnë të marrin një rol të përditshëm në qeverisjen e Venezuelës, përtej zbatimit të asaj që ai e quajti “karantinë nafte”. Këto deklarata erdhën një ditë pasi Trump kishte pohuar se SHBA do ta “administrojnë” përkohësisht vendin pas largimit të Maduro-s.
Rubio u përpoq të zbusë shqetësimet për një përfshirje afatgjatë amerikane, duke sqaruar se Uashingtoni do të vazhdojë të ushtrojë presion kryesisht përmes sanksioneve energjetike, të cilat i konsideron si mjetin kryesor të ndikimit për të nxitur ndryshime politike në Venezuelë.
Sipas të njëjtit raport, Rubio ka pasur një rol vendimtar në planin që çoi në arrestimin e Maduro-s, një zhvillim që lidhet me qëndrimin e tij të ashpër prej vitesh ndaj regjimit venezuelian. Sekretari amerikan i Shtetit ka mbështetur hapur ndryshimin e udhëheqjes në Venezuelë për më shumë se një dekadë dhe e konsideron Amerikën Latine si një rajon me rëndësi të veçantë strategjike për SHBA-në.
Njohja e gjuhës spanjolle, kontaktet e ngushta me opozitën venezueliane dhe marrëdhëniet me liderë të rajonit e bëjnë Rubion një figurë kyçe në hartimin e politikës amerikane ndaj Venezuelës. Megjithatë, nuk përjashtohet mundësia e emërimit të një të dërguari special me kohë të plotë, pasi vëllimi i vendimeve dhe përgjegjësive shihet si tepër i madh për t’u mbuluar nga një zyrtar i vetëm.
Nga ana e tij, Trump shmangu dhënien e përgjigjeve të qarta mbi mënyrën se si do të zhvillohet qeverisja e Venezuelës, duke deklaruar se situata do të menaxhohet “për një periudhë kohe” nga figura të administratës së tij. Ai përmendi gjithashtu kontaktet e para të Rubios me zëvendëspresidenten venezueliane Delcy Rodríguez, e cila ka hedhur poshtë publikisht çdo skenar ndikimi amerikan.
Në SHBA, zhvillimet kanë hapur një debat të ri politik. Senatorë demokratë akuzojnë Rubion se ka minimizuar natyrën e operacionit përballë Kongresit, ndërsa ai këmbëngul se bëhet fjalë për një veprim të zbatimit të ligjit dhe jo për një operacion ushtarak. Kjo qasje, megjithatë, po vihet në dyshim nga analistë dhe ekspertë të sigurisë.
