Sali Berisha, në një konferencë për mediat ditën e sotme, tha se kryeministri Edi Rama nuk do të pranojë asnjë verdikt, që do të japë drejtësia për zëvendëskryeministren Belinda Balluku.
Berisha u shpreh se Rama po bën luftë të hapur kundër drejtësisë. Sipas tij, Rama është një “kufomë politike”, që duhet rrëzuar.
“Ne jemi gati të përballemi me Edi Ramën në betejë përfundimtare për betejën e votës së lirë. Të gjitha të dhënat janë se Rama nuk do pranojë verdiktin e drejtësisë për Ballukun, prandaj protestat tona janë të rëndësishme. Protestat janë nën moton ‘Ja vdekje, ja liri’ dhe ne do të fitojmë. Sa herë që kemi pasur këtë moto, ne kemi triumfuar. Rilindja është e vdekur, në vdekje klinike. Duhet të largojmë Ramaduron. Edi Rama është një kufomë politike, që po kundërmon në Europë dhe në botë dhe na përket ne t’i varrosim ato”, tha Berisha.
Për Berishën, protestat e fuqishme dhe të vazhdueshme mund ta rrëzojnë Edi Ramën, pasi “në Shqipëri nuk ka më votë të lirë”.
“Protestat e vazhdueshme do fillojnë pa asnjë diskutim. Ne po ndjekim situatën dhe e themi me bindje se nuk ka rrugë tjetër për të larguar qeverinë, përpos se me protesta të vazhdueshme. Largimi i Maduros është një lajm i mirë edhe për shqiptarët, sepse është inkurajim i opozitës që të largojnë Ramaduron. Siguroj se PD do të bëj analizën brenda partisë dhe se do të fitojmë. Zgjedhjet më 2009 dhe 2013 ishin demokratike, kurse sot jemi në një diktaturë. Regjimi nuk ikën me votë. Kam lexuar lajme se Lea Ypi mund të bëhet kryeministre teknike, por nuk e di sa janë të vërteta”, deklaroi Berisha.
