Zyra e Rregullatorit për Energji (ZRRE) e Kosovës ka vendosur të ulë çmimin e ngrohjes për konsumatorët e ndërmarrjeve publike në Prishtinë dhe Gjakovë.
Sipas njoftimit, çmimi i ngrohjes me matje për konsumatorët e “Termokos”-it në kryeqytet është ulur me 3.8 për qind, ndërsa për konsumatorët në Gjakovë ulja është 5 për qind.
Vendimi u miratua gjatë mbledhjes së ZRRE-së të martën.
Çmimi i deritanishëm për ngrohjen me matje ishte 76 centë për kilovat në muaj, i vendosur vitin e kaluar. Me çmimin e ri, konsumatorët në Prishtinë do të paguajnë 73 centë për kilovat në muaj, ndërsa ata në Gjakovë 72 centë.
Termokos ka rreth 25.000 konsumatorë në Prishtinë. Sezoni i ngrohjes zakonisht nis më 15 tetor dhe përfundon më 15 prill. Vitin e kaluar, shumë qytetarë të Prishtinës kishin shprehur pakënaqësi për çmimin e ngrohjes, duke u ankuar për faturat mujore.
