Nga Klodian Tomori
Banda e gjeti sërish justifikimin për të mashtruar qytetarët. Tubi i Vlorës që u ça, sipas tyre, qenka vendosur nga Sali Berisha në vitin 2009. Dhe meqë Saliu “i bënte gjërat keq” sepse vidhte shumë, paska vendosur një tub të lirë, defektoz, që sot nuk prodhohet më nga asnjë fabrikë në botë.
Por nga viti 2009 kanë kaluar 17 vjet. Dhe për 17 vjet, në Ujësjellësin e Vlorës janë shpenzuar qindra miliona euro në tendera. Vetëm në mars të këtij viti janë dhënë 7.5 milionë euro, fituar nga 2T e Gramos Sakos dhe Alko Impex e Arber Abazit.
Pra problemi nuk është “tubi i Saliut”. Problemi janë tentakulat kriminale të një bande, që përmes një grushti kompanish kanë përpirë miliarda euro në ujësjellësat e gjithë vendit.
Në Vlorë është Sako, në Durrës Kovaçi, më tej Alko, e kështu me radhë. Këto nuk janë kompani të Saliut, por janë lubitë e Lubisë së madhe dhe zarlubive të vegjël, që fillimisht u vendosën në ujësjellësa dhe më pas u shndërruan në makineri elektorale, për të prodhuar rezultate rekord votash.
Këta kanë bërë kërdinë në ujësjellësat e Shqipërisë.
Dhe kjo nuk ishte korrupsion rastësor. Ishte një skemë e menduar mirë. Fillimisht u bë “reforma” e famshme e centralizimit, ku ujësjellësat iu hoqën bashkive dhe u përqendruan te ministria dhe AKUM-i. U shit si reformë shpëtimtare, që do të rregullonte financat dhe furnizimin me ujë. Në realitet, ishte vetëm përqendrim i tenderave në duart e pak kompanive të lidhura me pushtetin.
Miliardat e ujit u zhdukën për të blerë vota në Fier, Vlorë e kudo tjetër, ndërsa uji vetë u zhduk nga çezmat e qytetarëve.
Dhe për të mbuluar dështimin, në Vlorë u shpik “armiku i brendshëm”: disa punonjës e ish-punonjës të ujësjellësit, që paskan vjedhur paga me gjykatë.
Ndërkohë, në nivel kombëtar u shpik edhe hapi tjetër: krijimi i Operatorit Kombëtar të Ujit, sipas modelit të OSHEE-së, sepse – sipas tyre – as centralizimi i parë nuk mjaftonte. Duhej edhe më shumë pushtet, edhe më shumë kontroll, edhe më shumë para në një dorë.
Kështu që arsyeja pse sot vlonjatët – dhe shqiptarët – po mbesin pa ujë në shekullin XXI, nuk është Bashkia e Vlorës, as “tubi i Saliut”. Është zorra e trashë e lubive, që është futur thellë në sistem dhe po i pi gjakun qytetarëve.
Dhe me shumë gjasë, e vërteta do të dalë edhe nga telefonat e sekuestruar nga SPAK.
17 vjet dhe prapë tek tubi i Saliut.
Fundja, ç’janë 17 vjet? Asgjë.
Por për armiqtë janë 17 shekuj.
Ndaj, deri sa të përfundojë edhe “përqendrimi i përqendrimit”, duhet durim.
