Ka nisur protesta e thirrur nga Partia Demokratike, pasditen e kësaj të hëne te Kryeministria, aty ku kërkohet largimi i Edi Ramës dhe Belinda Ballukut, pas skandaleve që kanë përfshirë qeverinë.
Me pankarta në duar demokratët janë mbledhur edhe ditën e sotme për të gjashtën herë radhazi para institucionit qeveritar, ndërsa një javë më parë PD organizoi edhe një tjetër protestë.
Edhe ditën e sotme qytetarët dhe përfaqësuesit e PD-së do të mbajnë fjalimet e tyre, ndërsa si pasojë e kësaj proteste janë bllokuar edhe disa rrugë në kryeqytet.
Konkretisht, nga ora 15:00 deri në përfundim të protestës, është bllokuar qarkullimi i automjeteve në bulevardin “Dëshmorët e Kombit”, nga kryqëzimi pranë Ministrisë së Brendshme deri te sheshi “Nënë Tereza”, si edhe në rrugët “Ukraina e Lirë”, “Papa Gjon Pali II” dhe “Ismail Qemali”.
