Autoritetet italiane kanë goditur një rrjet të dyshuar për financimin e organizatës terroriste Hamas, duke arrestuar nëntë persona dhe sekuestruar pasuri me vlerë rreth 8 milionë euro. Operacioni është zhvilluar nga Prokuroria Antimafia dhe Antiterrorizëm e Xhenovës, në bashkëpunim me Policinë e Shtetit dhe Gardën e Financës.
Në qendër të hetimit ndodhet Mohammad Hannoun, i konsideruar nga hetuesit si figura kyçe e një strukture që për më shumë se dy dekada dyshohet se ka mbledhur fonde në Itali për t’i dërguar Hamasit, nën petkun e shoqatave humanitare. Sipas autoriteteve, ai ka transferuar rreth 7 milionë euro drejt organizatës, kryesisht pas 7 tetorit 2023.
Hannoun, i cili ishte president i një prej shoqatave palestineze më të njohura në Itali dhe kishte marrë pjesë edhe në aktivitete institucionale, akuzohet se ka drejtuar një rrjet të strukturuar me degë në disa qytete italiane, duke përdorur organizata bamirësie si mbulesë për financimin e Hamasit.
Operacioni çoi në arrestimin e nëntë personave dhe në sekuestrimin e pasurive me vlerë rreth 8 milionë euro. Ndër të arrestuarit janë edhe persona të identifikuar si bashkëpunëtorë të strukturës, me role në menaxhimin e fondeve, propagandë dhe transferime financiare ndërkombëtare.
Sipas Prokurorisë, fondet janë mbledhur përmes shoqatave që paraqiteshin si humanitare, por që në realitet kanalizonin shumicën e parave drejt strukturave të lidhura me Hamasin, përfshirë organizata të shpallura të paligjshme nga autoritetet izraelite.
