Policia Kufitare e Kapshticës ka arrestuar 8 persona të shpallur në kërkim për vepra të ndryshme penale, që variojnë nga kontrabanda e mallrave, prodhimi dhe shitja e narkotikëve, deri te kalimi i paligjshëm i kufirit shqiptaro-grek.
Të ndaluarit janë nga qytete të ndryshme të vendit, përfshirë Elbasanin, Korçën, Lezhën, Tiranën, Pogradecin, Peshkopinë dhe Maliqin. Mes tyre është edhe një doganier, i cili akuzohet për shpërdorim detyre, pasi nuk ushtroi kontrollin e nevojshëm në një rast kontrabande.
Sipas njoftimit zyrtar, u arrestua E. Rr., 26 vjeç nga Elbasani, i dënuar me 9 muaj burg për moskallëzim krimi, nga të cilët i kanë mbetur për të vuajtur edhe 2 muaj e 11 ditë. Po ashtu, u ndalua I.E., 33 vjeç nga Pogradeci, ndaj të cilit Gjykata e Korçës ka caktuar masën e sigurisë “Arrest në burg” për prodhim dhe shitje narkotikësh.
Në kuadër të kontrolleve të imtësishme, policia ka goditur dy raste kontrabande. Në flagrancë u arrestua A. M., 46 vjeç nga Lezha, i cili tentoi të kalonte kufirin pa kryer procedurat doganore me një sasi prej 1506 kg mjaltë, e cila u sekuestrua si provë materiale.
Gjithashtu, nisi procedimi penal për L., 35 vjeç nga Tirana, për kontrabandë mallrash, si dhe për doganierin E.M., 35 vjeç nga Korça, i akuzuar për shpërdorim detyre. Hetimet treguan se ai nuk kishte ushtruar kontroll mbi automjetin e shtetasit I. L., ku u gjet një sasi e konsiderueshme vaj ulliri pa dokumentacion, e dyshuar si kontrabandë nga Greqia.
Policia referoi materialet në Prokurori edhe për tre persona të tjerë: F.Xh., 46 vjeç nga Maliqi, V.R., 46 vjeç nga Pogradeci dhe B.Xh., 55 vjeç nga Peshkopia. Ata akuzohen për kalim të paligjshëm të kufirit nga Greqia drejt Shqipërisë.
