Në Patos Renato Aliaj, baba i një fëmije të sapolindur, ndeshet me një absurditet burokratik. Ai nuk mund ta regjistrojë djalin, sepse sistemi i Gjendjes Civile e shfaq si jo banor të Patosit edhe pse ai jeton në këtë qytet prej vitesh.
Kur kërkon sqarime, përgjegjësja e Gjendjes Civile në Fier e pret me arrogancë, duke shfaqur bezdi që Renato shfaqet me gazetarin. Në fakt problemi nuk është individual, por ka prekur edhe qytetarë të tjerë.
Përgjegjësja e Gjendjes Civile në Patos, Afërdita Beqiraj pranon se gabimi nuk është faj i qytetarëve dhe se po punohet me urbanistikën e bashkisë për ta korrigjuar.
“Është konstatuar një problematikë në lidhje me adresat e vendbanimit për disa shtetas dhe në bashkëpunim me urbanistikën është ngritur problemi që ka probleme me ndarjen e kufijve. Faktikisht janë transferuar disa banorë pa dijeninë e tyre”, tha përgjegjësja e Gjendjes Civile në Patos.
Edhe kryebashkiaku i Patosit, Fation Duro, premton se çështja do trajtohet menjëherë. Pas ndërhyrjes së emisionit “Stop”, problemi zgjidhet, fëmija regjistrohet dhe Renato falënderon stafin e programit.
“Bashkia Patos i ka marrë të gjitha hapat që i takojnë bashkisë për zgjidhjen e këtij problemi. Ne kemi mbaruar pjesën e vendosjes së kufijve territorialë të Bashkisë së Patosit që është një nga ato duhet bërë dhe gjithashtu kemi drejtuar problemin tek ministria përkatëse, ku presim edhe një përgjigje. Besoj se do të marrë zgjidhje së shpejti”, thotë kryebashkiaku Fation Duro. /Tv Klan
