Një krim brutal ndodhi sot (25 dhjetor) në Boden të Suedisë, kur një i ri vrau një grua me një hanxhar dhe la të plagosur dy persona të tjerë, në një sulm që po hetohet nëse ka lidhje edhe me një akt terrorist.
Ngjarja ndodhi në një rezidencë dhe viktima është 55-vjeçare. Sipas informacioneve nga Swedenherald, autori plagosi edhe dy persona të tjerë përpara se policia ta qëllonte dhe ta vriste.
Policia tha në një deklaratë se ishte informuar se një burrë i moshës afërsisht 20-30 vjeç kishte sulmuar banorët me hanxhar në dorë. Në përpjekje për ta arrestuar atë, policia hapi zjarr dhe e plagosi për vdekje.
Dy të plagosurit u dërguan në spital, ku dhe po trajtohen. Motivet e krimit janë ende të panjohura.
Qyteti i Bodenit ndodhet rreth 80 kilometra në jug të Rrethit Arktik dhe është shtëpia e Regjimentit të 19-të të Këmbësorisë Suedeze.
