Drejtoria Rajonale e Agjencia Kombëtare e Ushqimit (AKU) në Tiranë ka bllokuar këtë të mërkurë 5 ton djathë Gouda dhe 944 kilogramë fileto pule, me arsyetimin se produktet nuk ishin të pajisura me kundër-etiketë në gjuhën shqipe.
Subjekti është ndëshkuar edhe me gjobë administrative për shkelje të rregullave të etiketimit dhe gjurmueshmërisë.
Formalisht, ligji është zbatuar. Por në praktikë lind pyetja që AKU nuk e sqaron: pse reagimi është i menjëhershëm për mungesë gjuhe në etiketë, ndërsa për rrezikun real ndaj shëndetit publik pesticidet, salmonelën, toksinat reagimi vjen me vonesë, ose pasi produktet janë konsumuar?
Skandalet që AKU i “pa” me vonesë
Ndërsa sot bllokohen ushqime për mungesë përkthimi, muajt e fundit janë shënuar raste të rënda ku ushqime të rrezikshme kanë qarkulluar lirshëm:
Speca me pesticide – Gjatë verës që lam pas një sasi specash të kuq të eksportuar drejt Sllovenisë u tërhoq dhe u asgjësua për shkak të niveleve të larta të pesticideve (acetamiprid, formetanate, flonicamid). Paralajmërimi erdhi nga importuesi, jo nga reagimi në kohë i autoriteteve shqiptare.
Domate dhe pjeshkë të ndaluara në Kroaci – Në shtator 4 ton domate nga Berati u asgjësuan për shkak të pesticidit chlorfenapyr (5 herë mbi normë), ndërsa 5 ton pjeshkë nga Divjaka u bllokuan për prezencë të metalit të rëndë nikel.
Mandarina me pesticide të ndaluara – Në nëntor dhe dhjetor të vitit të kaluar RASFF raportoi disa raste të ndotjes me Chlorpyrifos dhe Phosmet. Në një rast, 21 ton mandarina u kthyen mbrapsht nga Kroacia; u arrestuan tre persona dhe një inspektor u prangos për certifikatë fitosanitare fiktive.
Qumësht me alfatoksinë – Nga 26 mostra, 10 rezultuan pozitive; rreth 40% e qumështit të kontrolluar tejkalonte normat e sigurisë.
Salmonela që u njoftua pasi u konsumua
Rasti më flagrant mbetet mishi i pulës me salmonelë: 18.3 ton fileto pule të importuara nga Brazili rezultuan të kontaminuara në Portin e Durrësit, por 13.1 ton ishin shpërndarë në treg përpara se AKU të njoftonte publikisht. Konsumatorët u informuan një javë pas analizave, kur një pjesë e mirë e mishit ishte konsumuar.
