Autoriteti italian i konkurrencës ka gjobitur Ryanair me 256 milionë euro për abuzim me pozicionin e saj dominues në treg, për të kufizuar shitjet e biletave nga agjentët e udhëtimit online.
Autoriteti tha se linja ajrore më e madhe e Evropës “zbatoi një strategji abuzive për të penguar agjentët e udhëtimit” përmes një “strategjie komplekse” barrierash teknike për agjentët dhe pasagjerët.
Ajo synonte ta bënte më të vështirë për agjentët e udhëtimit online të shesin bileta në dobi të faqes së saj të internetit.
Gjoba, raporton Guardian, kishte të bënte me praktikat e Ryanair midis prillit 2023 dhe të paktën deri në prill 2025. Heqja e menjëhershme e Ryanair nga faqet e internetit të agjencive në fund të vitit 2023 shkaktoi një rënie në shitjet e linjës ajrore, e cila nga ana tjetër goditi fitimet, por jo deri në atë pikë sa t’i ndikonte ato në mënyrë dramatike.
Praktikat e Ryanair përfshinin zbatimin e procedurave të njohjes së fytyrës për njerëzit që blinin bileta përmes palëve të treta, duke pretenduar se kjo ishte e nevojshme për arsye sigurie.
Më pas, ajo “bllokoi plotësisht ose me ndërprerje përpjekjet e rezervimit nga agjentët e udhëtimit”, duke përfshirë bllokimin e metodave të pagesës dhe fshirjen masive të llogarive.
Linja ajrore më pas “imponoi marrëveshje partneriteti” mbi agjentët që ndalonin shitjet e Ryanair në bashkëpunim me linja të tjera ajrore. Vetëm këtë prill, Ryanair mori masa që lejojnë konkurrencën.
Ryanair tha se do të apelonte menjëherë vendimin e autoritetit italian, të cilin e përshkroi si “ligjërisht të gabuar”.
Drejtori ekzekutiv i Ryanair, Michael O’Leary, kishte vendosur t’u shpallte luftë agjentëve “piratë” të udhëtimit online si Booking.com, Kiwi dhe Kayak.
O’Leary akuzoi industrinë për mashtrim dhe shfrytëzim të konsumatorëve të pavëmendshëm duke ngarkuar tarifa dhe rritje shtesë të çmimeve të biletave.
Ai madje ishte i përgatitur të pranonte shitje më të ulëta të biletave, ndërsa përpiqej të parandalonte agjentët e udhëtimit nga shitja e biletave duke i detyruar pasagjerët e tyre të plotësonin formularë shtesë, gjoja si një masë sigurie.
Vendimi, tha ai, është “një shkelje e ligjit të mbrojtjes së konsumatorit dhe konkurrencës”.
I njohur për deklaratat e tij agresive – madje edhe abuzive – O’Leary planifikon t’ia dorëzojë kontrollin e kompanisë një pasardhësi brenda 5-10 viteve të ardhshme. Ai do të marrë aksione me vlerë 111 milionë euro nëse qëndron në linjën ajrore deri në fund të korrikut 2028. Ai ishte tashmë miliarder në letër për shkak të aksioneve të tij.
