Pasi shkoi posaçërisht për t’i dhënë votën që ta bënte Avokat të Popullit, kryeministri Edi Rama e ka cilësuar Endri Shabanin si “të vetmin me një sy mes ca qorrave”.
“Pra e mbeshtetën Endri Shabanin, i dhanë firmat e kërkuara nga ligji, e sollën në buqetën e tyre të kandidatëve, ku për hir të së vërtetës, ky zotëria ishte i vetmi me një sy mes ca qorrave të ububushëm dhe sapo panë që ne, – që thamë që në krye të herës, nuk do të mbështesim asnjë kandidaturë, por do presim që të mbështesim një nga kandidaturat që do të na sjellë opozita – do ta mbështesnim zotin Shabani, u hodhën përpjetë sikur po bënim avokat të popullit ndonjë kandidatin tonë. ”, tha Rama.
Endri Shabani u zgjodh Avokat Populli më 11 dhjetor 2025, me firmat e Berishës dhe votat e Ramës, proces gjatë të cilit PD u akuzua për tradhëti ndaj demokratëve.
Opozita pretendon se firmat ishin vetëm për paraqitjen e kandidaturës në Komision, jo për ta futur për votim në Parlament.
Ironia është se Avokati i Popullit, një institucion që duhet të jetë i pavarur dhe mbi palët politike, e nisi mandatin e tij jo vetëm me votat e mazhorancës, por edhe nën hijen e batutave të kryeministrit.
