Një 30-vjeçar është dorëzuar sot pranë autoriteteve në Kalamata, në lidhje me vrasjen e dyfishtë të ndodhur në Finikounda në fillim të muajit tetor. Sipas mediave greke, ndaj tij ishte lëshuar një urdhër arresti ndërkombëtar dhe ai akuzohet për bashkëpunim në krim.
Ngjarja e rëndë tronditi zonën turistike të Finikoundas, ku u gjetën të vrarë pronari grek 68-vjeçar i një kampingu dhe një punëtor shqiptar që punonte në të njëjtin aktivitet.
Dorëzimi i 30-vjeçarit e çon në pesë numrin e personave të arrestuar deri tani për këtë çështje. Pak ditë më parë, me urdhër të oficerit hetues, u arrestuan nipi i pronarit të kampingut dhe një biznesmen nga Athina, mik i tij dhe bashkë-menaxher i aktivitetit. Të dy akuzohen për nxitje të krimit dhe janë lënë në paraburgim.
Autoritetet bëjnë me dije se 30-vjeçari i dorëzuar është mik i biznesmenit të arrestuar dhe dyshohet se ka pasur rol në organizimin ose realizimin e krimit. Përveç tyre, janë arrestuar edhe dy persona të tjerë për përfshirje në vrasjen e dyfishtë.
Nga ana e tij, nipi i pronarit grek ka mohuar akuzat, duke u deklaruar i pafajshëm. Ai ka pohuar se ka bashkëpunuar me autoritetet që nga fillimi i hetimeve dhe se akuzat ndaj tij janë të pabazuara. Edhe biznesmeni nga Athina ka këmbëngulur në pafajësinë e tij, duke pretenduar se është akuzuar padrejtësisht.
