Detaje të reja kanë dalë në dritë nga ngjarja e regjistruar paraditen e së dielës në Paskuqan, ku 65-vjeçari Halil Picari, me profesion hidraulik ra nga një pallat në ndërtim dhe për pasojë humbi jetën.
Lidhur me rastin, Policia reagoi vetëm pasi ngjarja u raportua në media dhe bëri me dije se ka vënë në pranga administratorin e firmës nënkontraktore “Al Great” sh.p.k., Avni Mekshi.
Ndërkohë burime për mediat bëjnë me dije se, kompania ndërtuese e objektit është “Fare Bau Albania” sh.p.k., e administruar nga Fabio Beshiri, djali i Shkëlqim (Çim) Beshirit, detaj ky i cili nuk është bërë publik në njoftimin zyrtar të policisë.
“Në orën 18:00, specialistët për Hetimin e Krimeve në Komisariatin e Policisë Nr. 5 arrestuan në flagrancë shtetasin A. M., 61 vjeç, me detyrë administrator i firmës nënkontraktore, pasi rreth orës 10:30, të ditës së sotme, në Paskuqan 1, gjatë punës, ka rënë nga lartësia shtetasi H. P., 64 vjeç (punëtor për punime hidraulike), i cili si pasojë ka humbur jetën”,- thuhej në njoftimin e Policisë.
Policia ka zgjedhur ta mbajë të fshehtë ngjarjen dhe të mos marrë masa për kompaninë ndërtuese, në një kohë kur ligji shqiptar parashikon përgjegjësi të përbashkët për garantimin e sigurisë në kantieret e ndërtimit.
Po kush është Shkëlqim (Çim) Beshiri?
Shkëlqim Beshiri, është biznesmeni i njohur si “lavatriçja” e parave të politikanëve, i cili ka shndërruar industrinë e ndërtimit në Shqipëri në një skemë masive pastrimi parash. Ai ka marrë me dhjetëra leje ndërtimi në Tiranë, Durrës, Lalz, Vlorë, Himarë, Sarandë, Lezhë e Shkodër, duke ngritur perandorinë e tij mbi financime të dyshimta, që nuk kanë kaluar kurrë përmes sistemit bankar.
Sipas raportimeve me firmën e Edi Ramës, Beshiri ka siguruar tre leje ndërtimi për hotele në bregdet dhe një kompleks ndërtimi prej 119 hektarësh në Gjirin e Lalzit. Gjithashtu, po me firmën e Ramës, Shkëlqim Beshiri ka marrë leje për kullë 65 kate tek ”Bulevardi i Ri”.
LEXO EDHE:
Vdekja e punëtorit në Paskuqan/ Ky është administratori i firmës, që u arrestua (EMRI)
E rëndë në Paskuqan/ Hidrauliku bie nga pallati dhe humb jetën, policia fsheh ngjarjen
