Gjykata e Shkodrës ka vendosur të lirojë shtatë të rinjtë e ndaluar pas përplasjes me thika që ndodhi pranë një shkolle në lagjen “Xhabije”.
Mes të ndaluarve ishin edhe dy të rriturit, Klevin Thepi, 24 vjeç, dhe Doronesto Kulla, 19 vjeç, ndërsa pesë të tjerët janë të mitur.
Pas seancës së sotme gjyqësore, trupi gjykues vendosi për të gjithë masën e sigurisë “Detyrim paraqitje”, duke i liruar nga qelia. Gjatë seancës, avokati mbrojtës i dy prej të miturve argumentoi se arrestimi ishte i paligjshëm dhe kërkoi pushimin e çështjes.
Ngjarja ndodhi të premten, në ambientet e jashtme të shkollës, ku pas një konflikti verbal mes grupeve të të rinjve, situata degjeneroi në dhunë fizike.
Ndërkohë ngjarja vjen vetëm disa ditë pasi i mituri Erion Boba, humbi jetën pasi u plagos me thikë nga një bashkëmoshatar.
