Gjykata e Shkallës së Parë e Juridiksionit të Përgjithshëm në Berat ka shpallur fajtorë dhe ka dënuar, ish-kreun e Shërbimit Informativ Shtetëror në Berat, Pandeli Shulla, dhe djalin e tij, Aleksandër Shulla, të akuzuar për organizimin e paligjshëm të lojërave të fatit, mbajtjen pa leje të armëve dhe nxjerrjen e sekretit shtetëror.
Pandeli Shulla u shpall fajtor për veprën penale të “Organizimit ose ushtrimit të veprimtarive të lojërave të fatit në kundërshtim me ligjin”, duke e dënuar me 2 vite burgim, dënim i cili u ul me një të tretën dhe u pezullua, duke e vendosur në provë për 2 vite e 8 muaj.
Ndërsa Aleksandër Shulla u shpall fajtor për “Mbajtjen pa leje të armëve dhe municionit” si dhe për “Tregimin e sekretit shtetëror nga personi që i është besuar”, duke u dënuar fillimisht me 6 muaj dhe 2 vite burgim. Pas uljes së dënimit me një të tretën, ai u dënua përfundimisht me 1 vit e 4 muaj burgim, dënim i cili u pezullua dhe u shoqërua me një periudhë prove prej 2 vite e 8 muajsh.
Gjithashtu, Aleksandër Shulla u privua nga e drejta për të ushtruar funksione publike për një periudhë prej 5 vitesh.
Hetimet
Sipas organit të akuzës, procedimi penal ndaj tyre nisi në vitin 2023, pas informacioneve të siguruara nga organet e hetimit se në një lokal në lagjen “30 Vjetori” të qytetit të Beratit, i administruar nga Pandeli Shulla, zhvilloheshin aktivitete të paligjshme të lojërave të fatit.
Gjatë kontrolleve, u konstatuan disa kompjuterë në funksion, në ekranet e të cilëve shfaqeshin lojëra online të ngjashme me ato të kazinove virtuale, të aksesueshme përmes aplikacioneve apo programeve të instaluara dhe të lidhura në internet.
Hetimet u zgjeruan edhe në banesën e Aleksander Shulla, ku gjatë kontrollit policor u gjetën municione të kalibrit 7.62 mm, disa krehëra të mbushur me fishekë, si dhe dy pajisje USB me mbishkrimet “Turbox” dhe “Kingston”. A.Sh., i cili kishte ushtruar më herët detyrën e punonjësit të Shërbimit Informativ të Shtetit, deklaroi se kishte dorëzuar armatimin pas largimit nga detyra në nëntor 2023, por kishte harruar të dorëzonte municionin, të cilin e kishte mbajtur si suvenir.
Megjithatë, nga verifikimet e kryera nga Prokuroria rezultoi se armatimet ishin kthyer sipas procedurave ligjore, fakt i provuar edhe nga dokumentacioni përkatës i dorëzimit. Po ashtu, u konstatua se dy materiale të gjetura në njërën prej USB-ve ishin të klasifikuara në nivelin “sekret” dhe administroheshin nga SHISH në kopje të vetme. Kopjimi dhe mbajtja e tyre jashtë strukturave zyrtare përbënte shkelje të rregullave të sigurisë së informacionit të klasifikuar.
Në përfundim të hetimeve, Prokuroria vlerësoi se ekzistonin prova të mjaftueshme për fajësinë e të pandehurve duke i shpallur fajtorë dhe dënuar.
