Policia e Elbasanit ka finalizuar operacionin policor të koduar “Metalurgjiku”, për goditjen e veprimtarive të paligjshme që dëmtojnë mjedisin.
Si rezultat i operacionit, u morën masa ndaj 16 shtetasve, mes tyre 9 shtetas të huaj, të cilët mbanin funksione drejtuese, teknike dhe operacionale në dy subjekte tregtare që ushtronin aktivitet në zonën e ish-Metalurgjikut, Bradashesh, Elbasan.
Në pranga ranë administratorë, drejtorë prodhimi, inxhinierë, përgjegjës turni, operatorë furre dhe punëtorë, të dyshuar për ushtrimin e një aktiviteti të paligjshëm në përpunimin e mbetjeve dhe prodhimin e ferrokromit, në shkelje të hapur të legjislacionit mjedisor.
Gjithashtu, u procedua penalisht Ismail Dybeli, 60 vjeç, shefi i Sektorit të Mjedisit në Bashkinë Elbasan, për veprat penale “Shpërdorimi i detyrës” dhe “Falsifikimi i dokumenteve”.
Mes të arrestuarve janë:
Juncheol Chung (J. C.), 64 vjeç, shtetas korean, administrator
Prakash Kadel (P. K.), 32 vjeç, shtetas nepalez
Shtetas indianë: Rahul Pal, Styend Pal, Munna Singh, Rajesh Yadav, Aaditiya Raj, Dheeraj Kumar, si dhe të tjerë me funksione teknike dhe operative
Shtetas shqiptarë: Jakup Karaj, Ismail Dybeli, Dorjan Xhufka, Elton Bejkolli, Besnik Abdiaj, Elton Beqi, Eglis Flaga, me role të ndryshme në aktivitetin e subjekteve.
Paralelisht, u shpallën në kërkim dhe u referuan materialet procedurale për 8 aksionerë të subjekteve tregtare, të dyshuar për veprat penale “Ndotja e ajrit, ujërave dhe e tokës”, “Fshehja e të ardhurave”, “Punësimi i paligjshëm” dhe “Pastrimi i produkteve të veprës penale ose veprimtarisë kriminale”, kryer në bashkëpunim. Vijon puna për kapjen e tyre.
Nga hetimet dhe inspektimet e kryera në bashkëpunim me Inspektoratin Kombëtar të Mbrojtjes së Territorit, rezultoi se dy subjektet juridike ushtronin aktivitet pa respektuar standardet mjedisore, duke ndotur ajrin, ujërat dhe tokën, si dhe duke shkelur rregullat për menaxhimin e integruar të mbetjeve, përfshirë edhe përpunimin e mbetjeve të baterive.
Për këto shkelje, ndaj dy subjekteve juridike u procedua penalisht bazuar në ligjin nr. 9754, datë 14.06.2007, “Për përgjegjësinë penale të personave juridikë”. Njëkohësisht, u vendosën masa administrative në vlerën 3 milionë lekë për njërin subjekt dhe 10 milionë lekë për subjektin tjetër, si dhe pezullimi i aktivitetit të të dy subjekteve deri në përmbushjen e plotë të kërkesave ligjore.
Gjatë operacionit u sekuestruan telefona celularë dhe pajisje DVR, të cilat do të shërbejnë si prova materiale në vijim të hetimeve.
