Presidenti Bajram Begaj ka dekretuar emërimin e Genti Shalës si gjyqtar i Gjykatës së Lartë.
Vendimi vjen si shpërblim për Shalën, pasi ai ishte një nga gjyqtarët që la në fuqi vendimin e dënimit për deputetin demokrat Ervin Salianji (tashmë i lirë).
Salianji ishte nën akuzë se ka prishur imazhin e trafikantit Agron (Geron) Xhafaj, vëllait të ish-ministrit të Brendshëm Fatmir Xhafaj, nëpërmjet “kallëzimit të rremë”.
Procesi gjyqësor ishte një ndër më skandalozët, pasi personat e akuzuar, më së pari, nuk kanë bërë asnjë kallëzim. Por ajo që është më e rënda, faktet dhe provat e administruara në dosjen gjyqësore provuan se gjithçka ishte e manipuluar në favor të trafikantit Xhafaj.
Megjithatë, asokohe Gjykata e Apelit nuk mori në konsideratë asnjë provë të paraqitur nga mbrojtja.
Gent Shala e kaloi Vetingut me shumë siklete, pasi Operacioni Ndërkombëtar i Monitorimit kërkoi shkarkimin e tij për probleme të theksuara me pasurinë.
Ndërkohë pjesë e trupës gjyqësore që mori vendim ishin edhe Iliba Bezat dhe Elona Toro.
