Është shtyrë në GJKKO seanca gjyqësore ndaj Behar Bajrit, Safet Bajrit dhe Astmer Bilalit, të akuzuar për vrasjen e Fatbardh Licit, ngjarje e ndodhur më 10 gusht të 2018-ës.
Mësohet se shkak për shtyrjen e seancës, është bërë mungesa e njërit prej avokatëve mbrojtës.
Fatbardh Lici u vra rreth shtatë vite më parë dhe dyshohet se ishte viktimë e përplasjes së vazhdueshme mes fiseve Lici dhe Bajri në Shkodër. Konflikti mes grupeve ka nisur që prej atentatit ndaj biznesmenit Lulzim Kulla në janar të vitit 2018 dhe ka vijuar me një seri vrasjesh dhe zhdukje personash në Shkodër.
Safet Bajri, më parë i ndaluar gjatë operacionit “Oaz” dhe i dënuar në Belgjikë, është arrestuar më 21 shkurt 2025. Ai dhe bashkëpunëtorët e tij akuzohen për “Vrasje me paramendim”, “Grup i strukturuar kriminal” dhe kryerjen e veprave penale nga organizata kriminale të strukturuara.
Motivi i vrasjes së Fatbardh Licit dyshohet të lidhet me hakmarrjen ndaj Ibrahim Licit, i cili ishte fajësuar nga Behar Bajri për vrasjen e ish-efektivit Boran Bërçana dhe bashkëjetueses së tij Silva Ndoci.
Saga e dhunës mes fiseve në Shkodër ka përfshirë një seri vrasjesh të tjera, duke prekur jo vetëm anëtarë të grupeve rivale, por edhe civilë dhe familjarë, duke lënë pas një histori të gjatë hakmarrjesh dhe dhune.
LEXO EDHE:
Përplasja Bajri – Lici/ Dosja e plotë e vrasjes së Fatbardh Licit
