Ish-presidenti i majtë i Bolivisë, Luis Arce, u arrestua të mërkurën,10 dhjetor, si pjesë e një hetimi për korrupsion, vetëm një muaj pas largimit nga posti i tij.
Sipas një urdhri arresti të publikuar nga mediat lokale, Arce po hetohet për përvetësim të dyshuar të miliona dollarëve nga fondet publike gjatë periudhës së tij si ministër i Financave.
“Në fillim thamë se Luis Arce do të ishte i pari që do të shkonte në burg, dhe po e bëjmë këtë realitet”, tha në një video të postuar në TikTok zv/presidenti i ri i Bolivisë, Edman Lara, duke uruar oficerët që e arrestuan Arce. “Ata që kanë vjedhur nga ky vend do të kthejnë çdo cent.”
Luis Arce, ekonomist socialist që udhëhoqi Bolivinë nga viti 2020 deri në nëntor të këtij viti, dorëzoi presidencën muajin e kaluar tek ish-deputeti centrist Rodrigo Paz, i cili fitoi zgjedhjet e balotazhit që shënuan përfundimin e pothuajse dy dekadave të dominimit të Lëvizjes për Socializëm (MAS) në politikën boliviane.
Paz ka premtuar të rindërtojë marrëdhëniet me Shtetet e Bashkuara dhe të arrijë një marrëveshje me FMN-në për të përmirësuar situatën ekonomike të vendit. Ai u betua më 8 nëntor, duke u bazuar në premtimin për “kapitalizëm për të gjithë”.
Bolivia ka përjetuar një krizë të thellë ekonomike vitet e fundit, ndërsa eksportet e gazit, një burim jetik të të ardhurave, janë reduktuar ndjeshëm. Rezervat e valutës së huaj thuajse u shterën në mars 2023, duke detyruar qeverinë të shesë rezervat e arit për të paguar importet e karburantit dhe shlyerjen e borxheve.
Akuzat ndaj Arce lidhen me fonde publike që dyshohet se janë përvetësuar gjatë periudhës së tij më shumë se një dekadë si ministër i Financave gjatë presidencës së Evo Morales, i cili ndryshoi ekonominë e Bolivisë duke zgjeruar kontrollin e shtetit mbi burimet natyrore dhe duke zbatuar programe sociale të gjera.
Evo Morales, i cili publikisht u nda me Arce para zgjedhjeve të këtij viti, po përballet gjithashtu me disa hetime dhe është ngarkuar zyrtarisht me akuza për trafikim të rënduar të qenieve njerëzore, lidhur me pretendimet se ka pasur një fëmijë me një vajzë 15-vjeçare. Ai ka mohuar shkeljet dhe i ka cilësuar akuzat si të motivuara politikisht.
Ministrja e mëparshme e qeverisë së Arce, María Nela Prada, deklaroi në një video të publikuar në rrjetet sociale nga jashtë stacionit policor ku Arce mbahej, se ish-presidenti ishte “rrëmbyer në mënyrë të paligjshme”.
Arrestimi i tij ndodh një javë pasi një ish-deputete e majtë, Lidia Patty, u arrestua për akuza se kishte marrë personalisht fonde për projekte që nuk u realizuan kurrë.
