Deputeti demokrat Ervin Salianji ka kritikuar drejtuesit e Partisë Demokratike për mungesën e transparencës dhe strategjisë në përzgjedhjen e kandidaturës për Avokatin e Popullit.
Në një takim me strukturat e PD në qytetin e Gjirokastrës, ai tha se partia duhet të ketë organizma të përgjegjshëm dhe të mos përsërisë gabimet e së kaluarës.
Ai tha se partia nuk mund të vazhdojë me justifikimin “na e hodhi Rama”, por duhet të mësojë nga gabimet.
“PD duhet të ringrihet, për të mbushur sheshet. Nëse ne nuk kemi guxim të ndryshojmë veten Shqipëria do ta ketë të vështirë, të ndryshojë. PD po duket që po atrofizohej, nuk po analizonte veten e vet. Sot më vjen mirë që pas fuqisë së demokratëve, PD sot është në një tjetër marsh.
Ka më shumë takime, analiza e debat. Në fund, dua të them se ne kemi diskutuar se si PD ka bërë gabime në sistemin zgjedhor, lënien e mandateve, ndarjen territoriale, tek mosvlerësimi i njerëzve që janë votuar tek qytetarët. Por edhe sot PD na paska bërë një gabim tjetër, i jap të drejtë Berishës që tha për Avokatin e Popullit.
A duhet vetëm të qajmë për gabimet që bëjmë. Si mundet PD dhe grupi parlamentar të shkojë pa strategji dhe ti japë ramës 15 emra dhe të zgjedhë cilin të dojë. Si mundet PD të mos ketë guximin të thotë që kandidatura jonë do jetë Adriana Kalaja, Skënder Aluci. Si ka mundësi që PD nuk mban qëndrim të qartë…”, tha ai.
